TE AKI MAM'ATAM

Te nebonebo Nakoim, te Uea ae Atuau!  I Bubutiiko ma te kainnano bwa n te Kaotioti aio are mai iai e a tia te rotongitong n onikaki nakon te oota, are mai iai e a tia ni kateaki Tembora ae Kakaawaki, ao e a tia ni kaotaki te Baba ni Koroboki ae e a tia ni Koreaki, ao rabunan te Niira-ni-Boki ae Tangaina e a tia ni kanakoaki, bwa Ko na karuoa nako aou ao nako aoia naake raraou ngkai te bwai are ti na konaa iai ni kiba rakea karawan Am mimitong ae e riao, ao are e na tebokiira man memean aekan nanououa ake a tia n tutukiia naake a namakina te ribuaka man te rin i nanon umanriannan Am katitueuana.

Au Uea, Ngai teuare e a tia ni kamatoa n taua koran Am tangira-n-aakoi, ao n nimta rabin Am ataata-iaomata ao Am bwai n aakoi.  Ko kataua i bukiu ao i bukiia naake a tangiraki irou raoiroin te aonaaba aio ao te aonaaba ae e na roko.  Kaonoiia, ngkanne, n te Bwai n Tangira ae e Raba are Ko a tia ni baaireia iai naake a rineaki mai buakoiia ake Ko karikiia.

Au Uea, aikai taian bong ake Ko a tia iai n tuangiia Am tabonibai bwa a na taua te aki mamatam.  E a karaoiroaki teuare e taua te aki mamatam ti i Bukim ao ma kororaoin te raurenako man bwaai ni kabane ma tiaki Mairoum.  Au Uea, buokai ao buokiia n ongeaaba Iroum ao ni kaawakin Am tua ni kairiiri.  Ni koaua iai Iroum te mwaaka ni karaoa are Ko rineia.

Bon akea te Atua bwa tii Ngkoe, te Kabanea n Ataibwai, te Kabanea ni Wanawana.  A bane nebonebo nakon te Atua ae te Uea n aonaaba ni kabane.